中崎町の日常
當年嚟到日本唔夠十日就去咗間好deep嘅K鋪，至此之後坐counter唱K成為習慣。
鋪頭分幾種，個場靚少少有媽媽或姐姐陪嘅叫snack，通常定額收費3千或以上，嘢飲另計，有啲仲限時。呢種地道啲有得飲有得食嘅可以稱為卡拉OK居酒屋，另外亦有飲酒為主嘅卡拉OK吧。
呢種場合，生有生玩，熟有熟玩。遇到唔識嘅人，又唔知點樣打開話題，不妨唱首歌先，唱完就有話題。我去旅行都鐘意去啲地道鋪頭唱K同當地人交流，好快打成一片。去開嘅地方，識唱咪一齊唱，歌詞用畫面嚟分，你唱一板我唱一板。甚至乎一齊練多幾次唱合唱曲玩埋和音都得。
順帶一提，日本唱K係無random嘅，順序你入一首我入一首(大概啦)。如果同佢哋講香港係鬥入得多然後唔知幾時輪到自己，佢哋應該無法理解。又，人地唱緊，你識唱都好，未經同意唔可以攞多支咪跟住唱，好無禮貌。