某天
- jackytora3809
- 2021年4月9日
- 読了時間: 2分
朝早起身，拎起手機，見到pokemon go有新task，於是踩單車去捉精靈。轉個彎，地面散落一粒粒白色物體，但係無睇清楚係咩。再行前，見有個光頭伯伯背向我坐喺某戶嘅花槽邊。我不以為然，繼續去捉精靈。十分鐘後，捉得差唔多，又再經過同一位置。今次望真啲，原來成地都係花生，再行前，伯伯打橫瞓咗喺花槽裏面。我心諗︰「佢想…曬太陽？…幻覺嚟嘅啫。」繼續前進。
「哥哥仔！哥哥仔！」身後響起叫喚聲。
「唔撚係呀化。」我馬上煞停，推車返轉頭。
「唔該！幫幫手！我出唔到嚟。」伯伯身處嘅，係一個家門邊用紅磚砌嘅小花槽，花槽裏面擺放咗好幾個盆栽。佢身形略為肥壯，喺呢個狹小嘅空間，同啲植物一樣動彈不得。好彩佢有力，不太難就拉咗佢企起身。
「唔該哂！麻煩哂！」伯伯手上有外衣、有個袋，仲有個吉嘅包裝袋。我望望花槽，話︰
「你仲有個口罩同埋棚假牙喺裏面。」於是佢踎低執返，我從後托住佢兩邊手臂扶佢起身。
「你係咪住喺呢度架？」我問。
「唔係，呢度係鄰居。」佢答。佢向横巷前進，我一直從後扶住。
「鄰居？你整爛咗人哋花盆喎。」目測至少一個。
「係呀~又激嬲人喇。都唔係第一次喇。」仲要係慣犯。「平時無事，一飲咗酒就係咁。」
「咁你適可而止啦。」我答。
「哈哈哈！你真係好人。」橫巷轉個彎，就係伯伯屋企。伯伯拍門。
「喂！開門呀！」碰碰碰碰。未有反應。
「喂！快啲呀！」碰碰碰碰。聽到有人應。伯伯轉身話︰「我老婆行得唔快。」然後攞個銀包出嚟︰「多謝你送我返嚟。」遞咗1000yen俾我。
「唔係幾好意思嘅——」
「嚟，小小心意，揸住。」
「好嘅，多謝多謝。」
伯伯嘅老婆行到出嚟，話︰「唉呀，真係羞愧至極。」
「呢個哥哥仔送我返嚟架！睇下佢幾好人，仲唔快啲多謝。」你無叫住我真係當幻覺架咋。
「多謝你！唔好意思麻煩到你。」婆婆話。
「唔好客氣，我多謝就真。」然後我就轉身離開。轉個彎，諗起使唔使同婆婆講聲伯伯整爛咗人哋個花盆。算啦，既然係慣犯，好快會水落石出。
呢度真係唔少人一飲酒就唔自制。醉完返到屋企對家人呼呼喝喝，唔講道理。
我攞返架單車，穿過一堆花生回家去。5分鐘賺1000yen，破哂紀錄。
コメント