Burlesque Osaka
- jackytora3809
- 2022年5月6日
- 読了時間: 1分
早排喺一位識途老馬帶領之下，嚟到大阪北新地嘅show club「Burlesque Osaka」。美女開show前會埋嚟逐枱打招呼，俾面嘅話可以叫杯Tequila，或者開支香檳又得。
開香檳嘅話少不免被靚女們前呼後擁，仲要攞支酒上台行一轉跳幾下再攞返落嚟請你享用。之後靚女們輪流上台載歌載舞，着下裙又着下泳衣，玩下水又玩下鋼管，令人大開眼界。
臨尾全場客人起身一齊跳，high埋一份。最後派埋貼士散場，全程大約個半鐘。
相信大家好關心，咁好玩嘅地方，埋單幾錢呢？
入場費有預約平啲，每月23日(遇23週日則改為24日)每位3300yen，包1 show & 1 drink。其他日子就1 show起碼5500yen。俾完入場費之後，場內消費要喺場內換場內嘅銀紙「Rion」，1000yen換10張。螢光棒2張，酒一杯10張，香檳1支…唔知幾多張呢？派貼士俾女仔都係用Rion，由你親手涉入佢件衫(條帶)度。有客人豪派500Rion，同靚女一齊上台，靚女坐喺櫈上，上方懸掛裝住Rion嘅巨型氣球，由豪客攞支大叉篤爆個氣球。卜一聲響，銀紙飄飄散落泳裝女郎身上，好一片紫醉金迷，好一片奢華盛世。又，其實未必一定要咁奢侈，你只要唱2000yen換夠廿張，慳慳地每人派一張，已經可以派哂(涉哂)全部，亦係賞心樂事。
原來幾百蚊港紙可以有咁好節目，直情衝擊價值觀。不如每月23號組團，冬天熱辣辣，夏天涼浸浸，四季如春，那管多事之秋。
コメント