Day 1062 4月11日

今日原本諗住去食水魚嘅，順便報告一下近況，但係「楓」嘅大老闆娘打嚟，話而家喺「Amanoya」坐低咗，於是我搞掂手上嘅嘢，就踩單車去商店街裏面嘅居酒屋「Amanoya」。

簡介一下，「楓」係一間只得bar枱嘅小酒館，坐七八個人已經好滿，有卡拉ok。我三年嚟嘅生日會都喺呢度搞。大老闆娘(mama)同啲熟客介紹我嘅時候，總係話「我係Jacky喺大阪嘅阿媽呀！」佢而家已經退下火線，每個月只象徵式做兩日。細老闆娘本身係熟客，上年六月開始接手，佢同佢男朋友兩個人經營。最近因為疫情關係閂門唔做。

我喺「楓」度識到商店街某麵店嘅店長連哥。聽聞連哥以前喺商店街有自己鋪頭，所以人面好廣，同我嘅房東亦係相識。只係連哥鍾意寸9房東，啲對話聽唔明都好好笑。我做咗連哥嘅熟客仔之後，問連哥附近有咩好食，佢推介我去「Amanoya」。連嫂係嗰度嘅樓面，同店主(master)兩個人做一間鋪。鋪頭Bar枱(counter席)再加兩張枱，大約坐到20人。

今日相當旺場，門口一枱似係三代同堂，埋邊counter坐滿，mama仲有兩位佢嘅熟客喺中間一枱。

「今日同阿泉san喺附近飲酒，飲完又想去多間喎，咁又搵埋小黑，跟住就諗起你喇，啱啱好！」mama話。然後同熟客們講︰「本來Jacky上個月生日，但係上個月好手緊，所以就改咗今個月至慶祝，哈哈哈！」

有得飲有得食我一啲都唔介意。

「Jacky, highball。」連嫂從後放低淡黃嘅whiskey soda。

「唔該哂——飲杯~辛苦哂~多謝哂~」大家碰杯。

「而家叫咗份刺身，想食咩就叫啦。」mama話。

「好，多謝！」我答。然而，呢度嘅餐牌可以話係草書寫成，好睇，但係又好難睇。就喺我同連嫂研究緊個餐牌嘅時候，三人爆笑。寫完嘢，馬上了解下發生咩事。

「係燒鯖魚呀，唔係炒麵呀，哈哈哈！」mama話。

「講咗係燒鯖魚嘛，點會特登走嚟食炒麵呢，哈哈！」泉san和應。

「嘻嘻，點知啫，炒麵唔得嘅咩？」小黑笑答。

原來係小黑聽錯咗，呢度嘅名菜係炒麵(yakisoba)，應該係燒鯖魚(yakisaba)至啱。咁就夠三位老人家開心到碌地。

「哇，好耐無試過咁高興。」mama話。「今晚搭的士返屋企，飲多啲都唔怕。」

連嫂接連上菜。先嚟一個刺身拼盤。各種鮮味不在話下，但最突出嘅始終係鯖魚。明明係午餐定食最常見平平無奇嘅魚，做成刺身，竟是說不出的甜。甜美而肉厚，大啖大啖，好鬼滿足。

然後再嚟連嫂推介嘅燒洋葱配洋葱汁。洋葱係「新」洋葱，意指春天收割，未經一個月乾燥就推出市面。嫩滑而鮮甜，完全唔辣。洋葱汁係用洋葱磨成，唔係橙色一劈杰撻撻淋喺飯面嗰啲。呢個汁如果可以配個肉，甚至和牛就一流。不過佢哋喜歡食個材料嘅本來味道，只要將一個洋葱發揮到極致就可以上碟，呢個係文化嘅唔同。

「講起搭的士呀，」mama繼續滔滔不絕，「有次搭的士，無見到細細隻字寫住禁煙，我唔知吖嘛，個的士佬車咗我去警署喎，哇，即刻火都嚟埋，大大聲鬧佢，『你做乜嘢車我嚟呢啲咁嘅地方呀！』我越鬧佢越走，我咪繼續鬧，『你同我企喺度！』」

嗯，mama一發不可收拾嘅情境我大概想像到，都唔係未見過。

「跟住第二日又要特登走去警署，我又大大聲話︰『邊個尋日同我做手續嘅同我出嚟！』警察問我係咪飲醉咗，我答佢︰『我係飲醉咗就唔會記得要返嚟啦！』」

「大概幾耐之前？」我笑問。

「好耐嚕。」mama答。不過佢咁多年嚟一樣咁好火氣。

連嫂又上酒又上菜。嚟咗一道牛肋肉炒筍，竟然用咗焦糖。呢招阿媽煎雞翼就用得多，其他地方未食過。然後終於嚟咗主角，yakisaba-sushi。

泉san︰「呢件最好，舊飯最大！」

Mama︰「話明鯖魚係主角，妳揀舊飯最大做咩？…呢件好！」

我︰「真係任我揀？真係任我揀？」既然各有所好，我就毫不客氣揀咗件刺身望落去最闊嘅。今次魚皮稍為燒香咗，甜美依舊，肉厚依舊。鯖魚好食嘅秘密，可能喺個醋度，辟咗腥味，帶起甜味。Mama另外再order一份打包，又要我都打包一份。盛情難卻，就叫咗一份「松前」鯖魚壽司拎走。

「part time聽日第一次返？」mama問我。

「係呀，已經買咗手套。」我答。話說份part time係mama嘅老公介紹。大概係做啲場地佈置。「楓」嘅細老闆娘嘅男友會同我一齊去。

「阿覺以前成日有返架。嗰陣佢過到嚟大阪無穩定工作，公司又啱啱起步，所以兼職幫補下。而家有穩定收入，又接到大公司訂單，就無再去囉。佢話喎，而家返一兩日去減下肥都好喎，哈哈哈。」話說mama同阿覺相識好幾年，但係舊年至啱啱結婚。為咗享受新婚人妻嘅生活，所以至決定退休。佢話到10月佢就會完全退出鋪頭，我今日至知。

「我好奇問下，」泉san話，「呢啲兼職咁樣呢，外國人可以做架可？」

Mama即刻答︰「梗係可以啦！唔做得嘅點會介紹俾佢做呢？」

泉san繼續問︰「即係咁，外國人打工多少有啲限制……」

「都話咗唔做得唔會介紹囉！」mama嘅反應有啲大。

「限制多少係有嘅——」我搵到機會入一入。

「呀係咩？好多外國人都做緊架！有人做緊所以先介紹架！明未呀？」

我諗mama大概係唔鍾意俾人質疑，又或者咩原因都好，我諗我要終結呢個話題。

「一般嚟講外國人可以做嘅工種同埋兼職係有限制，但係，」我喺銀包度攞咗張在留卡出嚟俾大家睇，「呢度後面有個印仔，有呢個印就可以做兼職。」我舊年疫情關係申請嘅。

「原來係咁，」泉san似乎滿足我嘅答案，「我諗過，最壞、最壞打算呢，睇下我個仔幫唔幫到手吖嘛。不過我都唔知佢其實做緊咩，哈哈哈！」

「妳阿仔做嗰啲，好似係網絡行銷，我無經驗應該做唔嚟。我需要一份要用到中英文嘅工作至可以留得低。多謝妳心意。」我答。

「我諗住睇下幫唔幫到手啫。咁我個仔其實係做咩架？」泉san問。

「咪即係做宣傳、賣嘢囉。」mama答。我唔知我啱唔啱，我拎起一隻水杯，話︰

「譬如我造咗隻水杯，想賣出去。想喺網上賣出去，但係唔知點樣俾多啲人見到，就要搵妳個仔問意見。」我唔知呀，係掛。

連嫂又上菜，壓軸登場嘅(因為漏單)，係雞潤刺身。我本身好少食內臟，飲茶間中會食兩塊牛栢葉，跟得日本人多所以會食腸鍋(motsunabe)，或者燒肉嘅時候燒幾舊腸，但係啲心呀肝呀，始終有啲抗拒，要生食就更驚。不過，自從連哥帶我嚟食過雞潤刺身之後，我對呢碟生勾勾血淋淋嘅菜式完全改觀。點一點麻油加鹽，口感同魚生差唔多，但係更加滑嫩，輕輕一咬，竟然係一絲涼快嘅甘甜。可以令肝臟無法驅除嘅腥味華麗轉身，真係歎為觀止。

甜品係咖啡味雪糕，可能係自家製，好香好香嘅咖啡味。

咁多樣菜，不約而同都有不同嘅甜味。係故意，定係巧合。轉念一想，あまの家Amanoya，Ama咪就係甜嘅意思囉！

送咗mama上的士就返屋企。收到連哥嘅Line，話Highball 200yen一杯，快啲嚟。我話聽朝有part time。佢話得啦，快啲買梳打水過去。我選擇無視，食兩件松前鯖魚壽司，追埋少少進擊的巨人漫畫就瞓。

#徇眾要求要多甜 #浪速求生日誌 #Naniwasurvival #nanisaba #港人 #大阪 #日本 #海外生活