Day 1073 4月22日
- jackytora3809
- 2021年4月23日
- 読了時間: 1分
1. 返工唔夠幾日，話咁快就開始在宅勤務。聽落就好爽，但係新人乜7都唔識，點樣交接工作？結果變咗8小時電話教學。上司電話一邊講「你睇住A呢個，去修改B，按我頭先講咁做，做完Send返俾我」。又唔係真係好難，但係一日十幾二十個，邊春個打邊春個？我暈啦。難怪我嘅上一手做唔夠半年就想走，好彩我有幾年經驗搭救。不過，我嘅上司話想長期休養，所以交接完之後就係我一個人搞哂。有趣有趣。又嚟緊急事態宣言，睇怕直到上司走人之前都係維持現狀。
2. 公司嘅會長(太上皇)似乎好睇得起我，第一日就俾咗3000YEN我，叫我自己買書去學日商簿記3級，即係會計。不過講起我同會計嘅淵源呢…
中三升中四嘅時候陰差陽錯揀咗讀會計，但係學完Debit同Credit之後我所有嘢都入唔到腦。我專心想聽書嘅時候miss喺度吹水，我無精神嘅時候教學進度突飛猛進。除咗八字唔夾之外我解釋唔到。到考試嗰日，我坐撚咗喺度望住份卷，竭力想𢯎多一兩分，但我做唔到。中四升中五，我主動申請Drop咗呢科。結果我順利原校升中六。
十九幾年後遠走二千五百公里外，竟然再與會計碰頭，點算？上司同會長講咗「而家好忙你唔好搞Jacky住」。嗯，劈埋一邊先。
コメント