Day 1091 5月11日

難得搵到一份跟足紅日放假嘅工，返咗兩星期就馬上黃金週，好似好爽。但由於緊急狀態宣言、天雨關係以及沉迷<<JoJo的奇妙冒險>>(圖為承太郎站姿)，假期過得相當頹廢。一轉眼又返回現實。

公司現時維持在家工作，大概一星期出勤一次，其餘時間繼續電話教學。我學得辛苦，上司亦教得辛苦。電話講得耐總會有幾下收得唔好甚至斷線。再加上大家母語唔係日文，表達能力總會差啲。

上司係朝鮮族，即係中日韓文都識。佢同大陸工廠傾電話時係普通話，但係對我講日文，間中夾雜幾隻中文單字。簡單形容佢嘅為人，就係溫柔而堅定嘅母親形。可惜佢喺公司咁多年，溫柔換嚟嘅係背叛，堅定換嚟嘅喺冷待，最終決定請辭。

公司好細，佢離職之後，淨返幾丁友。會長好少返工，社長長期喺大陸，寫字樓得返營業部長、營業員，同埋貿易事務嘅我，三個人。雖然聽埋聽埋上司講咗唔少恩恩怨怨，不過佢還佢，我還我，我只係接手佢嘅工作，我點樣同同事相處就睇我造化了。總覺得，上司雖然工作盡責，但對公司投入咗太多感情，未必係好事。

比起人事關係，手上嘅工作當然更重要。上司嘅工作方式係︰所有文件九成九靠人手處理。幾百件貨，每個流程要用唔同資料，唔同資料分開唔同excel唔同sheet，每次做文件都要每件貨逐件逐件ctrl+F搵資料。佢話，用excel formular容易走位有error喎。嗯…咁應該諗點樣除錯好啲呀…所以將來要逐個逐個步驟諗點樣用vlookup簡化，仲要學吓其他新招至得。

順帶一提，5月10日係來日三週年。今年努力工作，站穩陣腳，展望將來。

#浪速求生日誌 #Naniwasurvival #nanisaba #港人 #大阪 #日本 #海外生活