今日好撚熱血咁喺屋企踩咗一粒鐘單車，去尼崎市睇尼子騷兵衛(忍者亂太郎)展覽。做乜咁神心？忍者亂太郎都算係童年回憶嘅一部分。同埋，我純粹想搵個地方去下，因為我好需要散下心。
實不相瞞，我喺8月尾染疫，直到3日前終於療養解除，重獲自由。最初係朋友告知，佢確診，問我有無事，我話無。點知第二日就燒到39.6度，終日迷迷糊糊，醒完又瞓瞓完又醒。食粒退燒餅瞓到天光睇醫生。睇完醫生淨係俾咗啲平時嘅感冒藥，第二日繼續發燒喉痛，仲有啲呼吸困難。由於好早醒咗，但係晨早流流想搵醫生睇嘅話，要俾多11000yen，仲只有一日藥，所以叠埋心水，處理好公司業務，再請一日病假，朝早9點再去睇返平時個醫生。但佢只係俾多咗一隻止痾藥。做一做血液帶氧濃度測試，結果正常。咁所謂嘅呼吸唔暢順睇嚟只係鼻塞XD當日繼續醒完又瞓瞓完又醒。間屋住咗三年幾，第一次覺得張床原來咁唔舒服，又窄又硬。到下午5點幾終於有人打嚟約我做PCR檢查。翌日下午三點幾竄出去做檢查，一個鐘就返到屋企，病假都慳返。往後幾日體溫一直喺37.6~38徘徊，我就一直繼續在家工作。食飯就係每日竄出去7仔或者超市求其買啲嘢。好多人關心中武肺會失去味覺。我就唔知點解掉返轉，食嘢會覺得好重味，所以要揀啲清淡啲嘅嚟食。胃口一直麻麻地，不過總算keep住有食嘢。星期六收到營業部長聯絡，話驚我有咩三長兩短，所以叫我星期一起，直到病好之前，每日抽時間教佢手下做我啲嘢。哇屌，我仲發緊燒，你叫我教人？我大大話話學咗成兩個幾月，我要由邊度教起？我淨係請咗一日病假，(老細有啲文件急所以我星期六幫佢做咗)你唔減輕我負擔我都無所謂，仲要我額外花時間精力去教人？你無撚嘢下哇？咁當然佢有佢立場，公司不能停止運作，而我又無辦法證明到俾佢睇我唔會死。佢星期日又打嚟，話要搵埋大陸嗰邊啲同事連續星期一至五每日一齊開個zoom去俾我教人，我邊度有力嚟呀？你落井下石嘅功夫咁撚了得，週末都無得俾我好過，我真係屌你老母。結果，喺星期日黃昏，大阪市保健所打嚟，傾咗一個好長嘅電話。至此之後，我原本好返啲嘅喉嚨就一直好撚乾燥，一講嘢就咳。所以我就連續三日推咗呢個濕鳩會。而好好彩，我終於退咗燒。根據大阪市保健所嘅判斷，連續三日唔再發燒，就達成療養解除嘅條件。即使未完全痊癒，體內嘅病毒水平已經不足以傳染其他人。咁我總算證明到自己唔會死，所以zoom就慳返。但係佢話搵一日都要開一開會，俾大家知道發生咗咩事，內容佢再諗。屌，我無發燒嘅話，陪你9點玩到6點又有咩所謂，睇下邊個時間多啲？
喺我發燒之前嗰日，我仲有同林生飲酒，不過好彩佢無事。而sharehouse嘅房東同租客，我有諗過同佢哋講我陽性嘅，但最後都係覺得無謂引起不必要嘅恐慌，所以自己摺埋喺房，一出外就帶口罩。好彩，大家望落無穿無爛，應該無傳染到俾人。保健所嗰邊係有安排到酒店隔離，但到佢預約到我已經退咗燒，都係算啦，留俾有需要嘅人。
今日一日踩咗兩粒幾鐘單車，去完尼崎又直落日本橋派手信，同fd飲酒，再踩單車返屋企，多少係想證明俾自己睇，我無事，只要多加鍛鍊，仲可以走得更遠。我覺得，生老病死係人生必經階段。我接受唔到要一直驚一個疫症而惶惶不可終日。如果一日驚到黑，我會問，我嘅人生究竟為咩而活？咩緊急狀態、自肅，一路持續幾個月、半年，見唔到盡頭，但係屬於你人生嘅幾個月、半年，係唔會有人賠得返俾你。當然，我一人在外係瀟灑啲，有屋企人一齊又唔同講法，唔係每個人都輕症可以了事。總之，我可能係求仁得仁，或者係最好嘅結果。
營業部長叫我，今個月盡量少啲出街。我心諗，我係撳得住自己我就唔會出事啦。如果佢問起，我會話週末留咗喺屋企睇Eva同高達。
