Day 1211 9月7日
- jackytora3809
- 2021年9月9日
- 読了時間: 1分
今日謹從艇隊創隊隊長嘅最高指示，朝早起身跑個步至開工。
最近由於養病，病好咗反而養成早睡早起嘅習慣。一早彈起身唔知做咩好，咁就不如跑下步。敦爺話，佢以前跑東京皇居。大阪無咁高級，不過亦有唔錯嘅地方。我踩單車嚟到淀川河邊至起跑。河畔藍天白雲，綠草如茵。有烏龜同水鳥喺浮木上歇息，又有水手服學生妹踩單車經過。好一個大阪早晨，好一幅日本風情畫。
咁多年嚟除咗追車之外鮮有跑步，雙腿好重，腰間乏力，跑下停下，又影下相，流一身汗，又幾寫意。之前一路搵唔到原動力，經此一疫，理由已經喺度。即使無人陪，我都想做落去。每日或隔日20~30分鐘，體質已經好唔同。
返到屋企附近買個早餐，Seven行出嚟撞到中華料理店長(蒸魚豉油甜嗰間)，佢見我一副運動look，問︰「今日休息呀？」
我話︰「在宅工作，啱啱去完淀川跑步。」
佢失笑︰「咁健康？！」
我拍一拍佢膞頭︰「再傾！」
然後開始忙亂嘅一日。
コメント