Day 1215 9月11日

話說自從我染疫之後，公司由三個人輪流返工，改為完全在宅工作，有事嘅話事先申報咗先，再返公司。我就不得越雷池一步。咁之但係我嘅工作(貿易事務+總務課)真係得我一個人做，你係咁依都俾我返去一次睇下啲信，整理下啲文件都要掛。於是乎同營業部長傾，佢話，平日唔得，你星期六返去啦，記得消毒同開窗，仲有走嗰時抽氣扇唔好閂。結果我星期五就無嘢做喺度hea，星期六就要額外花時間去處理公務。咁啱喺大陸嘅老細問起，有無人可以幫手去打簿scan俾佢睇，我話，我星期六返去搞啦。跟住我推測老細非常緊張，即刻千里傳音問部長點解俾我返公司。營業部長將佢解畫嗰段字轉發俾我，再打電話嚟叫我未到月尾唔好有第二次，內容大致係︰

「我批淮咗Lai san星期六返去公司一次︰ ※保健所承認解除隔離，已經達一星期 ①平日不可 ②我一直有幫手，但係文件堆積，佢無論如何都想返去整理一次 條件︰ 佢要戴口罩防止感染，返到去要消毒，開窗，走嘅時候為工作枱同寫字樓消毒。(抽氣扇長開)」

抽氣扇就不嬲都着住，你有熄過咩。消毒喎，消你老味咩，而家我最撚安全呀，你啲打毒針嘅人，抗體遲早跌，預約定打第四針啦你仆街，睇住血壓添呀。總務課得我一個，你claim錢搵邊個？砸住幾萬yen很想要吧？

結果我file返啲文件，又攞返啲要用嘅嘢，跟住再去交雜費，去銀行打簿，返嚟再幫人claim錢，咁就搞咗三粒鐘。之後約咗fd遲咗成粒鐘先到。

晏晝約咗兩個香港fd。一個話想學日文N2速成，但我當時就全部打機自學嘅，唔知曉唔曉教人，於是我搵咗個有教學經驗嘅fd子教佢。咁阿fd子又真係教得頭頭是道，由考試技巧講起，又講下自己邊度最唔明，要注意。我後join，求其從旁講兩句。我話，最緊要平時同人傾計嗰時，有啲咩唔識講，表達唔到嘅，返屋企諗多次，咁至知道自己缺咗啲咩字。呢個係我嘅日文補完計劃。

之後三點約咗個學生教佢中文。學生其實本身係【楓】以前老闆娘嘅熟客。有次咁啱老闆娘老公搵我傾公事，撞到佢，佢就話想學普通話。佢阿爺以前去過台灣，所以受影響曾經學過下中文，可惜半途而廢。咁而家咁啱撞到我，不如試一試啦。平時咁多人話想跟我學中文學英文，佢就真係我第一個學生，咁就教咗三個月。上堂就喺我屋企附近嘅cafe，每個月兩三次，每次大概三粒鐘。其實都係吹水多，似幫我練日文多啲，反正不停講教科書佢又悶。然後講下講下就會吹到啲飲食呀、節日呀、歷史嘅話題。今次由廣西三江嘅鳥巢建築，講到南洋賣豬仔，又吹到洋務運動、甲午戰爭，慈禧太后挪用北洋艦隊軍費修繕頤和園，被八國聯軍付諸一炬。內容由淺入深，但係呢啲字都唔知學嚟做咩。興趣嘅嘢，佢開心就好，係咁上下。

八月份佢打完第一針之後燒到40℃，仲高過我，我又抱恙，所以8月其實無乜點上過堂。但係佢9月份照出糧俾我，仲送多支燒酎添，相當客氣。

夜晩本來約咗sharehouse個土耳其人farewell，佢12號搬走。但我同另一個大叔去敲佢門又唔喺度，於是兩個人去食牛肉飯，然後再去結他bar度飲酒，玩得好高興。

#浪速求生日誌 #Naniwasurvival #nanisaba #港人 #大阪 #日本 #海外生活 #日本生活