Day 1263 10月29日
- jackytora3809
- 2021年10月30日
- 読了時間: 1分
由於公司短期內請兩個新人，營業課長趕住喺新人返工之前大執位，所以9月尾幾日間不停搬枱搬櫈，搬printer搬雪櫃，掉舊嘢買新嘢，好鬼忙。內部終於安頓落嚟之後，輪到業務出事。大陸大規模停電，啲交期亂哂大龍之餘，原材料價格又上昇。即係貨又唔知幾時交到，但係訂單又要摷返出嚟改單價。好不容易斟好咗出貨清單，個客又話想追加，煩到嘔電。
喺呢段非常時期，日元下跌，老細叫我去銀行幫佢換錢。我諗住反正要外出，約同一日下晝攞老細架車去換胎，又撞正月尾，返嚟仲要幫佢對數，體力大透支，回家夜晚8點幾就瞓着咗，5點前瞓醒，碌到7點幾起身去跑步，好撚充實。
新人Designer唔經唔覺已經嚟咗一個月。由於課長忙緊協調大陸事宜，似乎無咩Design嘅工作俾佢做。有時課長叫佢去做市場調查，即係去100yen店行吓，買吓sample。另外，佢見office入面個鐵櫃同一道電線槽嘅鐵門格格不入，於是買啲貼紙返嚟，將個櫃改成白色，夾返牆紙顏色，鐵門就改做木紋，即刻順眼咗。佢問我有咩要幫手，我就點佢數下有咩文具要買，預約丟棄大型垃圾之類。
今日Designer claim錢，送我一條迷你龍。犀利，識笑嘅。今次諗都唔使諗，回佢一條哈古龍。佢話︰「估唔到會進化咗返返嚟。」好想練好自己啲畫，然後瘋狂claim錢俾佢。
p.s.之前一路將課長叫咗做部長
コメント