Day1042 3月22日

大家好。小弟要寫長文，通常都係一件事。係，我又轉咗工喇XD

做咩事做咗半年多啲又唔撈呢？第一，人工低而且嘥時間。第二，驚簽證出事。

先講第一。間鋪頭本來喺尼崎市，為咗做觀光客生意所以搬嚟大阪市內嘅酒店樓下。但係由於無觀光客，所以酒店長期未開張。而即使酒店開張，亦唔知幾時至有外國遊客(東京奧運都冇)。咁公司現狀係點？本來用嚟朝9晚9分兩更嘅人手就變得多餘。一個月起碼放十日假，計時薪1000円人工就好低。話3個月就可以轉我做full time，結果一路都未轉。而工作量根本唔多，除咗有新貨到，要影相修圖做資料放上網賣之外，好多時真係由天光坐到天黑。 有時一間鋪一日有四個人喺度鬥hea，有人向老細反映，老細就話「係你哋話想返多啲出多啲糧至編更俾你架喎」XD 真係有錢人至做得到。有同事光明正大攞書出嚟溫，但人哋做嘢熟手，我乜成績都未有就唔敢啦。

錢又唔多、無經驗可以累積、無了期等待，遲早要走嘅話，早走早着。

第二，亦係主因，簽證問題。公司唔係唔肯幫我整，雖然公司admin完全唔識搞，但已經按我要求俾齊足夠嘅文件，其他嘢我自行預備。行政書士睇過呢一set嘢，亦係覺得過到骨嘅。但係一樣嘢我好唔願意嘅，就係要同入國管理局講大話。講到咁嚴重？頭先提到，我喺公司一路都係part time狀態，其實揸正嚟講係唔得嘅。工作簽證一定要有full time全職(有例外但在此不贅)。講好咗3個月研修，但半年有多連合約都無一份，係我講到「要申請嘅話做個樣都要俾張嘢人睇吖」，佢至肯幫我吸個印，張嘢都係我自己整嘅。如此這般，我就迫住喺4月1日死線前逃亡。當然，明知呢間嘢鬼鬼地，但之前又貪圖安逸，搞到咁狼狽，完全係自己攞嚟。

於是，我又開始周圍send cv。但係半年轉一次工嘅cv，只有石沉大海一途。去到2月頭，我走咗上人類最後嘅堡壘hello work。職員超好人，幫我搵咗三份。箭無虛發，三份都有回音！

第一間in嘅(下稱S社)，係做集運。佢請人要求要有車牌，識講普通話/廣東話/福建話/台語為佳。由於係物流業，所以少不免擔擔抬抬。老細話，即使而家時勢唔好，但為咗公司將來着想，點都需要人材。同埋，簽證方面會全力支持。公司中港台乜人都有，申請唔會有問題。不過，由於公司地方有限，呢個工序會搬去臨空城附近(關西機場下一站)。而公司俾嘅車費上限係每月三萬yen。已經有同事計劃緊搬屋喇，你都考慮下啦。所有條件你一次過考慮，一星期後覆啦。

吓，吓吓吓吓？！！唔係耍9我下哇？肯搞visa但係要去臨空城？一日來回三粒幾鐘？點解要俾個咁雞肋嘅選擇我…見完工返嚟失魂落魄六神無主，房東即刻收工拖咗我去飲酒XD

第二間in嘅(下稱K社)，係貿易公司。公司一路都用緊英文同大陸工廠溝通緊，所以想請個識中文嘅人咁話。貿易嘅話，我有四年經驗，應該就無咩問題。可惜呢間公司唔急請人，老細叫我自己搞掂個簽證先，佢哋可能等埋5月份公司新財政年度至正式請。同埋佢哋仲有幾個人要in，所以要到2月尾至有面試結果。

人工高，地點好，唔係visa問題嘅話我會想做，可惜小弟不材。

第三間，都係貿易公司(下稱M社)。用電話in，事前花咗頗多時間去做佢啲問題同埋性向測試。可惜開波無幾耐，老細就話佢唔知我原來想做full time，佢淨係想請part time。喂，好撚緊要呀，齋請part time我唔會搵你。

整理一下眼前嘅選擇，S社超遠，但visa最穩陣；K社條件最好，但係等唔切；M社唔入流。所以可以做嘅係︰

1.疊埋心水辭工去S社

2.放棄S社，留喺公司等K社好消息

3.去S社搞簽證之後再等K社好消息XD

又或者再簡單啲，簽證只有而家公司同S社做得到，揀邊個？咁梗係揀個穩陣嘅。所以，我決定辭職。早啲走，製造空檔，搵多一兩份in下。

當我同老細講唔做之後，佢無特別挽留，仲即日出埋糧俾我走。忽然last day，同事們都嚇一跳。我亦無諗過有此一着，但唔做都做咗，舉手不回。於是打俾S社老細，話決定兩星期之後返工。對方話好，但照樣會有試用期，唔好誤會，我話okay。

去總店攞埋份糧，係咁依簽咗張字，咁就一了百了。話俾朋友林生知，林生叫我上佢公司坐下。

林生公司賣日本酒，出口香港。我喺lawson買咗一堆零食上去送酒，邊飲邊傾。

「上年，又係喺呢度，又係同一個話題，話唔知點同屋企人交代。」講緊半年前。

「你年紀唔係細，諗清楚自己想做咩未？」我無言以對。林生電話忽然響起，一講就好耐唔收線，佢示意我飲住先，我就毫不客氣，喺身後嘅雪櫃度攞第二支出嚟試酒。老老實實，咩同一隻米唔同釀法、同一隻釀法但係唔同米，我真係試唔出有咩分別。我一路飲一路食，等佢收線。

「嗱，你而家新呢一份做住先，但你繼續搵工，搵到你真正想做嘅嘢為止。」呢個就係佢嘅結論。時間已過八點。緊急狀態宣言之下，想搵個地方食下飯都無，就此散場。

兩星期轉眼就過。中間再經hello work send咗兩份cv，都無回音。所以就係放咗一個愉快嘅假期。

新公司做集運。身處海外嘅人喺日本網站shopping完之後，送貨地址寫我哋公司，我哋分類之後送返去香港/台灣/馬來西亞。中間可能按不同客戶要求重新包裝，整細件啲，幾箱變一箱，慳返啲運費。目前一箱貨日本→香港door to door收600円，平過EMS，再多啲平均價再平。有唔少人係喺日本入貨經我哋運返香港賣，我日日望住有啲衝動想做代購^^

唔經唔覺返咗一個月，基本流程大概識，爭啲細節同文件處理未熟。以前做過貿易，所以管理貨流無問題。但話哂而家係物流，一定要落手落腳搬貨，係咁耐以嚟體力要求最高嘅一份工。都好，做下運動。另外，考到車牌終於喺工作用到，但只係兜個圈去後欄掉垃圾，送貨到機場就輪唔到新牌仔。返工好遠，9點返工，每日7:25上車8:36落車。但好彩JR關空快速可以一程車去到，睇下書瞓下覺又唔算好辛苦，so far未試過無位坐(疫情完咗就難講)。公司每月車費上限3万円，月票￥29950 XD 公司附近食飯就無乜選擇，想平嘅得一間烏冬…想食富貴啲就去outlet，附送無敵海景。貨倉同事得香港人、台灣人，間中有日本師奶Part time。老細喺市內收完貨會揸車送過嚟。一星期會見到三次左右。順帶一提，老細普通話幾近native，勁過唔少香港人。只係唔知佢開口會講日文定普通話先，所以要開定兩個channel等。

最關鍵嘅visa，返工一星期後我問過老細一次，佢話我未過試用期，然後我就一路都無問。距離死線仲有十日。

（P.S. 話說K社真係2月尾send email嚟話想second in，我考慮幾日後決定唔去了。visa唔肯搞，等佢咁耐結果仲要second in，我對呢個老細無咩好感。）