係咁依貢獻下日本經濟
- jackytora3809
- 2021年8月13日
- 読了時間: 3分
話說我早幾月喺網上開咗個樂天証券嘅戶口，但一直都無大動作。最近多假期，又無咩大煩惱，於是把心一橫，幾日之間入咗好幾隻股票。新手上路，並無太大深思熟慮，請不吝賜教。
首先第一隻係追蹤金價嘅ETF，金價升佢就升，金價跌佢就跌。通常股市一跌，資金就流入金市，金價就升，所以買定嚟做保險先。
第二隻，追蹤國內債劵嘅ETF。其實本身諗住買美國債劵，但係買錯咗日本嘢。唔緊要啦，樣樣試下，分散風險。債劵唔會大升大跌，係穩陣嘢，等收息。
第三隻，ANA，航空股。憧憬疫情完結會股價升返上去，而家平平地買咗擺住先。日本喺疫情之下搞無觀客奧運，真心蝕到阿媽都唔認得。但各國嘅中二病選手喺場上大放異彩，港隊喺半個主場取得六牌歷史佳績，相信大家對日本嘅愛已經滿瀉到噴出嚟，疫情一完仲唔搶閘飛過嚟。ANA旗下仲有廉航Peach。
株主優待︰
1. ANA國內線單程1大人2小童可用株主優待折扣價買機票
2. ANA集團優惠劵冊子(18張coupon)，可用於酒店、旅遊套票、免稅店
權利確定日︰3月31日、9月30日
講真，佢嘅機票折完都係貴。日本好多賣平飛嘅鋪頭，收啲火車飛返嚟轉賣，放嘅人應該係鐵路股嘅股東。機票酒店優惠唔知賣唔賣得。賣得出當派股息。
第四隻，H.I.S.，國內旅遊公司。買嘅理由同ANA差唔多。曾經有位港人朋友話，唔好買日股，買日股會蝕。咁我覺得，有錢賺嘅自然會升，無錢賺嘅自然會摺，無話日股就一定蝕嘅。順帶一提，該名朋友喺日本畢業之後就入咗H.I.S.做，一批就批咗5年嘅visa，羨煞旁人。既然得到入國管理局認定財政穏健，咁我一於就做我fd子嘅老細啦。
株主優待︰
1. 自社旅行商品1000円coupon×2枚
2. 位於九洲長崎、全日本面積最大主題公園HUIS TEN BOSCH 入場劵500円折扣(最多5人)
3. 位於愛知縣海邊嘅主題公園LAGUNA TEN BOSCH 入場劵500円折扣(最多5人)
權利確定日︰4月30日、10月31日
究竟要洗幾多錢至用到佢啲優惠？HUIS TEN BOSCH門票成人7000円、LAGUNA TEN BOSCH門票成人4350円。仲未計特登去旅行要花幾多錢。
第五隻，CAPCOM，遊戲公司。純粹因為有朋友買咗，所以跟風買。跟風嘅嘢，打死無怨，捨命陪君子。朋友有個page，我呢個表都係參考佢嘅表整出嚟。有興趣可以睇下︰
Cyan Tips投資頻道https://www.facebook.com/search/top?q=cyan%20tips%E6%8A%95%E8%B3%87%E9%A0%BB%E9%81%93
如果有錢我想買任天堂/SONY，但係任天堂一股5萬YEN，一手一百股，邊度嘔5百萬yen出嚟呢。SONY都要一球幾嘢至入到場。咁退而求其次，希望CAPCOM將來出多啲好game。
株主優待︰
1. 買game有得平？你就想。
美股方面，入咗隻債券ETF，都係求穩陣。手上仲有現金，等跌市再入貨。
原則上，投資之前應先預留自己半年生活費用，有剩至投入市場。雖然而家係有淨錢，但係相比喺嚟日本之前，身家燒咗唔少，仲未賺返嚟。主要原因係︰第一年working holiday完全洗腳唔抹腳，平日四圍飲酒，又去咗兩次一星期嘅long trip，返咗一次香港。第二年開始有固定月薪，相對穩定，但無控制開銷。第三年工作極不穩定，返工時數少。雖然疫情關係玩少咗，但相信係赤字。踏入第四年，終於有返固定收入，又有mark低自己消費記錄，開始諗點樣搵多啲。
睇返香港戶口所餘無幾，可以話已經完成資產轉移。接下來就努力喺呢邊發展了。
コメント