最近無更新，主要因為唔想講公事。唔講公事，係因為發生咗一段插曲。
話說公司4月請咗我之後，就幫我申請社會保險、雇用保險云云。一日，在家工作期間，收到上司電話，叫我第二日馬上、即刻去申請個「資格外活動許可」，最緊要快，講完就收咗線。當時不明所以。
「我而家咪做緊嘢囉，做咩要申請個做part time嘅資格？」
納悶良久，咁樣可能性只有一個，就係我手上呢個「求職用」嘅簽證，係不能夠工作。所以補鑊都好，都要快手整返個part time嘅資格。
當晚，遠在大陸嘅社長微信打電話嚟。
「經理同你講咗未？」社長問。
「講咗，佢叫我去申請資格外活動。」我答。
「你…係咪唔知道你個簽證唔可以做嘢？」
「我真係唔知道。好對唔住。」
「今次公司喺處理上有疏忽，公司亦有責任。不過，簽證係你自己嘅嘢，一個唔小心，你可能會被人……遞解出境…哈哈。知道嗎？」
「明白，好對唔住。」
「我以前喺日本嘅時候都試過簽證出問題，幾麻煩。總之以後小心啦。申請搞掂咗話我知。」
「係嘅。」
社長同我解釋之後點樣安排，並無太大嘅責備就放過咗我，但並唔代表事情告一段落。
第二日，我被迫扣將來嘅A/L去咗入管搞手續。上司吩咐，順便去問埋申請工作簽需要啲咩文件。搞完手續，去詢問處度問問。職員係中國人，散發住掩蓋不了嘅大媽氣息。
「我想問，由特定活動嘅就職活動轉返做『技人國』需要啲咩文件。」
「稍等。」大媽去攞咗幾張申請須知過嚟，又問︰「你而家咩簽證？」
「特定活動嘅就職活動。」我俾埋張卡佢睇。一睇，大媽皺哂眉。
「…唔啱喎。張卡錯嘅。」說時語氣充滿懷疑。我心諗︰吓？大媽唔好9 up喎，卡都有得錯？睇張卡唔夠，佢仲攞埋我本passport。
「你本身咩簽證？」
「『技人國』，轉咗做特定活動。」
「再之前呢？」
「最初係Working Holiday。」
佢忽然由日文轉做普通話︰「你現在這個簽證是怎樣申請的？」
「…就……疫情關係被解雇了更新不了才申請的。」書面上的確係咁。
「這就不對了嘛！」大媽越講越興奮，行出櫃檯搵另一個counter嘅日本大叔staff一齊share開心。我仲坐咗喺度，擰轉身聽下佢哋講乜。
「呢度又唔啱，嗰度又唔啱，全部都錯嘅！」大媽繼續炫耀佢嘅開心大發現。
日本大叔附和︰「係喎，咁就唔對路喇。」連排隊排頭位，西裝骨骨貎似行政書士嘅仁兄都笑笑口答咀︰「咁總會有錯手嘅，唔出奇~」
擾擾攘攘一輪，後面排緊隊等住問問題嘅各國年輕人都一頭霧水。我決定擰返轉面，扮唔知發生咩事。究竟搞乜春呀？我而家係咩狀態呀？返唔返得工呀？
好不容易大媽終於返埋位，我本passport同埋在留卡就俾大叔唔知拎咗去邊度，大媽話佢哋會搞掂，唔使擔心。人有錯手，唔好意思云云。跟住就講講轉簽證要咩文件。其實我都聽第三四次，循例聽聽，係嘅，唔該哂。
一起身，大叔出現喺身後。「張卡而家搞緊。呢張籌叫你冧巴就過去啦。」我揸住一張從未攞過嘅3字頭嘅籌，行到全層最入嘅「相談」櫃位——要飲啖茶食個包坐低慢慢講嘅，一定麻9煩喇。
兩個冧巴好快就輪到我。職員出示兩張在留卡，舊一張已經打窿。
「由於字面有誤，舊嘅一張卡將會廢棄。」邊講邊收起。「新呢一張請睇睇人名地址國藉啱唔啱。」今次輪到我㞒頭一皺，原本「只可從事指定書所指定之工作」嘅字面，改咗做「就勞不可」四隻字。
「就勞不可？」
「係呀，本身呢個簽證就係咁。而家改返啱。」
「咁如果搵到工呢？」
「咁就根據你搵到嘅工種，申請對應嘅簽證。」
哇屌。如果當日攞到張卡嘅時候，佢已經寫住「就勞不可」嘅話，咁我幾大即刻搞埋資格外活動吖。我又係大安主義嘅，人哋問我申唔申請，我諗住，都搵到工啦，唔使，結果出事。Passport釘住嗰張指定書，我有睇過，寫住允許就職活動，收取報酬之活動除外。我又諗，無理由吖，在留卡寫到唔係完全唔得咁款。有疑問，無求證，結果搞成咁。
喺資格外活動審批期間，我被禁足公司。而呢段時間，上司就幫我張羅轉簽證所須文件。一星期後，我又燒咗一日將來嘅A/L，先去公司度攞齊文件，然後就去入管。去入管度等咗一個鐘，攞咗資格外活動，然後遞表整工作簽。人超多，排160幾人，出去食個飯返嚟都仲等咗成個鐘，5點至打道回府。
可以返工之後，我同上司出勤嘅一日，會長嘅細佬，公司嘅社勞士顧問上咗嚟，詳細解釋安排。會長70幾歲，佢都應該有70，不過算幾精神。
三個人圓枱坐低。顧問喺白紙上劃一條線，寫上我各個簽證同資格失效同生效嘅日期，成為一條時間線。
「…喺你無任何工作許可呢一段期間呢，公司係唔可以出糧俾你。出咗糧俾你，就會影響你將來申請簽證。如果你有財政上嘅困難呢，咁你就要同社長商量下喇。」
「明白。」無收錢，就唔係黑工，係義工。
「咁你應得嘅收入點算呢？就喺你攞返工作簽證之後，當係bonus咁樣出俾你。當然，如果一攞到簽證即刻就出嘅話，就有點兒那個。」
「係嘅，就算年尾都唔緊要。」
「雖然而家無錢洗，但都唔係無好處。呢段時間你嘅社會保險同埋國民年金都唔使交，慳返一筆。你就當公司幫你儲錢啦。」
其實無得完全唔交，但我又可以好似上年咁，以疫情關係影響收人為由，申請全額豁免。
「顧問先生，」上司問︰「頭先Hello Work有個M先生打電話嚟，我唔敢亂講嘢，我話等你上嚟再打俾佢。」
「係咩？我呢度傾完之後都打算過去搵佢。」
「佢好似話兩點後唔喺度喎。」
「咁樣呀…睇嚟打一打俾佢先好啲。」
我哋就望住顧問先生打呢個電話。
「……係嘅，公司喺知道呢個情況之後呢，就按你之前咁講，事後申請脫離雇用保險，將佢解僱。」先生顯得小心翼翼，望一望我哋，我哋點頭。
「呢段時間呢，由於疫情關係，公司亦無工作俾佢，一直安排佢在家工作，亦無出糧。」先生又望一望我哋，我哋係咁點頭。
「……係。吓？……」先生臉色一變，我同上司相視，心知似乎不妙，但又無法得知對方講乜 ，只能等待收線。
「……係，文件陣間我會攞過去。係，拜託哂。」終於傾完。
「M先生話，公司而家咁樣係屬於違規，要負上責任。」
「吓？有無得請M先生幫幫手呀？」上司有點慌張。
「佢話，而家會由Hello Work同入管中間嘅一條team去調查，佢插唔到手。」說時先生一臉無奈。
瀨嘢。但亦唔想坐以待斃。
「入管之前整錯咗張卡俾我，有無得同佢講下數？」
「整錯？」
於是我去電腦印返上一張卡嘅遺照出嚟，好彩有留底，再攞而家張卡出嚟，分別一目了然。
「可唔可以揸住呢一點同佢傾傾？」呢個係我唯一希望。
「但係張指定書係寫住唔可以做嘢吖嘛。」上司講得有道理，我亦唔駁佢咀。之但係，黑工係大罪，行政機關出錯直接或間接令人誤墮法網，鬧大咗亦相當尷尬。不如打和啦，Super？
然後少不免講吓其他雜務。先生傾完就去Hello Work，我哋送佢到Lift口，千萬個唔該哂、麻煩你，拜託哂，直至機門完全關上。
「咁大件事我幾驚老細炒你魷魚呀﹐你欠老細一個好大嘅人情。總之無事就好彩啦。而家你都唔好擔心住啦，等公司幫你處理啦。」上司真正苦口婆心。
原來有啲事情，一出咗事，唔單止自己瀨嘢，係會累街坊，唔到你話一力承擔。而家只能夠等，究竟黑工調查組快啲﹐定係我個簽證申請快啲，定係一俾人查就會hold住唔批？無人知。諗嚟諗去，好影響心情。過幾日至平復。
至於上司本人，最終喺6月尾離職，放大假放到7月底。佢嘅一部分工作由顧問先生接手，顧問先生一個月會上嚟搵我一次處理啲admin事宜。我就開始要管理埋公司嘅現金，去便利店交電費電話費電郵server費，同事claim錢都係搵我。啲錢揈哂又去銀行攞。我嘅老本行貿易事務，總有啲細節位唔暢順，唯有慢慢適應。
如是者，又過咗兩星期，終於收到入管嘅明信片，即刻用最快速度去攞證。批咗，一年。雖然得一年，但已係得來不易。至於我俾人調查，查成點不得而知。申請成功我就當暫告一段落。而今次成功，係多得公司對我不離不棄。講真，公司無必要對我咁好。會長笑笑口話︰「呢間公司係咪好好呢，係大公司就炒咗你。」轉頭又話︰「蔓延防止對策完咗就同你去飲酒食飯嚕。」呢啲，係咪就叫做緣份。我又打電話去俾之前真係炒9咗我嘅老細，話俾佢知一切順利。佢話，咁就好喇。
重奪工作簽證，大功告成。但係以後嘅路，仲有好長。