庵野秀明展
- jackytora3809
- 2022年9月17日
- 読了時間: 3分
大阪有幾個展，先去最想去嘅︰
庵野最出名嘅作品係Evangelion系列，但搞得展覽自然就唔止EVA。會場入口用招牌嘅「EVA 明朝體」大字寫住︰
「造就了庵野秀明的作品
庵野秀明製作了的作品
以及往後將會製作的作品」
主題比EVA簡單易明十萬倍。
入場劈頭就係年青庵野着住幪面超人皮套嘅紙板公仔，天花板掛住左右兩個投影幕，左面播鹹蛋超人，右邊播幪面超人。牆上一個巨大年表，鉅細無遺紀錄庵野喺邊年睇咗邊套作品。行入有一部庵野父母喺家庭代工時代用過嘅古董腳踏衣車，據講係令庵野第一次切身地認識到機械活動嘅物品。另外，庵野出身嘅山口縣宇部市，山川海岸旁邊就係工業地帶。大型船舶、工廠、鐵路與自然共存嘅環境，亦對庵野嘅視覺帶來衝擊，對其日後作品有深遠影響。
「造就了庵野的作品」嘅展品，係昭和年代拍攝特攝片時曾經使用嘅道具或複製品，包括皮套、戰機、戰艦、槍枝等等。喺芸芸珍藏之中，私心覺得最正嘅係「超人七號」嘅ULTRA HAWK 1號；機頭至機尾呈等腰三角形，造型簡潔洗練，線條圓中帶方，直中有曲，反映出當時作者對科幻世界嘅想像。展品目測有兩米長，比其他機體大好幾倍。諗下呢部嘢吊住威也喺錄影廠飛嚟飛去都幾考功夫。
「庵野製作了的作品」最爆嘅係佢大學時期自行翻拍嘅一集「超人阿鄉」(歸來的超人)。庵野飾演變身後嘅超人——無錯，鬈毛、四眼、牛仔褲、波鞋，加件超人外套，心口黐盞燈，就去同怪獸打交，堪稱一套CULT片。
但係除咗套衫水皮啲之外，劇情、台詞、道具、運鏡、特效，全部有板有眼。呢個班底嘅人最初乜都唔識，由庵野買部攝影機返嚟開始，再自行摸索。作品以「DAICON FILM」名義發行，當時被円谷視為眼中釘。「DAICON FILM」嘅成員由素人到職人，後來組成咗「GAINAX」，製作咗「冒險少女娜汀亞」及Evangelion系列等名作。值得一提嘅係，由庵野企劃、編劇嘅「真．超人」(シン・ウルトラマン)最近終於喺日本上畫。經過幾十年，由無牌翻拍，到自己打出名堂揚威海外，再攞正牌幫円谷翻拍，真係一段非常勵志嘅奇幻歷程。佢下年仲會出一套「真．幪面超人」(シン・仮面ライダー)，拭目以待。
庵野除咗自己製作之餘，對保存、推廣動畫、特攝嘅文化及技術亦不遺餘力。2017年，NPO動畫特攝保存機構(ATAC)正式成立，由庵野出任理事長，旨在保存動畫、特攝製作途中嘅「中間製作物」(道具、原畫之類)，避免呢啲文化瑰寶成為「產業廢棄物」(垃圾)。要擺放咁多物品、定期搞展，自然需要地方，有地方就自然需要燈油火蠟租金管理費。雖然成本好高，不過如果想下個世紀嘅人仲有機會可以見到鬼乸咁大隻嘅ULTRA HAWK 1號，就要花啲功夫。
為免走數講定先，我決定成為ATAC贊助會員，略盡綿力。會員名簿上面留一個香港人嘅名字，算係聊表心意。
※場內准許拍攝大部分展品
コメント